ငါးကြင်းခေါင်းကို ကိုင်ကြည့်ခြင်း

lယခုအခါ၌ ကျွန်ုပ်တို့နိုင်ငံရေးအသိုင်းအ၀ိုင်းများတွင် ကန့်ကွက်ခြင်းနှင့် ကန့်ကွက်မဲပေးခြင်းဟူ၍ အယူအဆနှစ်မျိုး ပေါ်ထွက်လျက်ရှိပေသည်။ ထိုသို့အမြင်နှစ်မျိုးဖြစ်ရာတွင် အကြောင်းပြချက်အမျိုးမျိုး ရှိနေကြပါသည်။ ကျွန်ုပ်သည်လည်း ဤနေရာမှနေ၍ ကျွန်ုပ်၏အတွေးအမြင်ကို တင်ပြချင်ပါသည်။ သို့ ရာတွင် ကျွန်ုပ်သည် ပညာရှင်၊ ဗဟုသုတပြည့်စုံသူ မဟုတ်ပေ။ ထို့ကြောင့်လည်း “ငွေတမတ်နှင့်ငါးကြင်း ခေါင်းတက်ကိုင်သည် ” ဟူသော စကားဥပမာကိုပင် ခေါင်းစဉ်ယူလိုက်ပါမည်။ တခုပြောလိုသည်မှာ ကျွန်ုပ်သည် ပေါ်ပင်လိုက်၍ ဤစာကိုရေးသည်ဟု မထင်စေလိုပါ။ စစ်အာဏာရှင်များကို ကျွန်ုပ်က မည်သို့သဘောထားသည်ဟု ပြောလိုရင်းသာ အဓိကဖြစ်ပါသည်။
စစ်အာဏာရှင်တို့၏ သက်တမ်းတလျောက်တွင် အမျိုးသားညီလာခံ၊ အခြေခံဥပဒေ ဟူသော စကားလုံးနှစ်လုံးကို တွင်တွင်သုံး၍ မြန်မာပြည်သူများနှင့်တကွ ကမ္ဘာ့လူထုကြီးကိုပါ လှည့်စားပြီး အာဏာသက်တမ်းကို ဆွဲဆန့်ထားခဲ့ကြပါသည်။ ယခုလက်ရှိတွင်လည်း ထိုနည်းအတိုင်းပင်ဖြစ်ပါသည်။ ၎င်းတို့၏ဦးတည်ချက်မှာ အာဏာစည်းစိမ်ဥစ္စာကို မဆုံးရှုံးရေးပင်ဖြစ်သည်။ ချီးကျူးစရာကောင်းသည်မှာ ၎င်းတို့၏ဦးတည်ချက်ကို မည်သို့သောအကြောင်းကြောင့်မဆို မယိမ်းယိုင်စေခြင်းပင်ဖြစ်သည်။ ကျွန်ုပ်တို့ တွင် ထိုအရည်အချင်းမျိုး အားနည်းလျက်ရှိသည်ဟု ရိုးသားစွာယူဆပါသည်။
ဒေါက်တာလွဏ်းဆွေက မူကြိုကလေးများနှင့် ရောင်စုံဘော်လုံးကို ဥပမာပြု၍ သတိပေးထားပါ သည်။ ကျွန်ုပ်တို့တွင် ဒီမိုကရေစီ၊ ဖက်ဒရယ်ပြည်ထောင်စု စသောစနစ်မျိုးလိုချင်သည်။ လွယ်ကူစွာပြော ရလျှင် စစ်အာဏာရှင်စနစ် ချုပ်ငြိမ်းစေလိုသည်။ သို့သော် ကျွန်ုပ်တို့၏ဦးတည်ချက်သည် စစ်အာဏာရှင် တို့၏ လှုပ်ရှားမှုကိုလိုက်၍ ပီပြင်လာလိုက်၊ မှုန်ဝါးနေလိုက် ဖြစ်နေသည်ဟု ထင်ပါသည်။ ကျွန်ုပ်တို့ ပြတ် ပြတ်သားသား ပြုလုပ်သင့်ကြပြီဟု ယူဆပါသည်။ စစ်အာဏာရှင်များက တွေ့ဆုံဆွေးနွေးရေး၊ နိုင်ငံတ ကာဖိအားပေးမှု၊ စသည်တို့ကို လုံးဝဂရုမစိုက်ကြောင်း၊ နောက်ဆုံး အာဏာနှင့်ပတ်သက်လာလျှင် ရတနာသုံးပါးကိုပင် စော်ကားပြစ်မှားဖို့ရန် ၀န်မလေးကြောင်း ထင်ထင်ရှားရှားပြခဲ့ပြီဖြစ်ပါသည်။
ကျွန်ုပ်တို့အနေဖြင့် ယခုလိုအချိန်အခါတွင် ကျွန်ုပ်တို့၏ဦးတည်ချက် ဖြစ်မြောက်စေရေးအတွက် ရဲရင့်ပြတ်သားစွာ ပြုမူသင့်ကြပါပြီ။ ၎င်းတို့ခင်းပေးနေသောလမ်းကို လှည့်စားမှန်းသိလျက်နှင့် မျှော်တော် ယောင်ပြုလုပ်နေရန် မသင့်တော်တော့ပေ။ ဗိုလ်ချုပ်အောင်ဆန်း၏ အနီးကပ်ဆုံးရန်သူကိုရှာပြီးတိုက်ကြ ဟူသောရဲရဲတောက်မိန့်ခွန်းသည် ယနေ့ထက်တိုင် ခေတ်မီဆဲ အသုံးဝင်ဆဲပင်ဖြစ်ပါသည်ဟုပြော လိုပါသည်။ ယခုအခါ၎င်းတို့အကွက်ဖေါ်သည့်အတိုင်း တစ်သံတည်းထွက်နေရာက နှစ်သံဖြစ်သွားပါပြီ။ ကျွန်ုပ်အနေဖြင့် ပြတ်ပြတ်သားသားဆန့်ကျင်တိုက်ခိုက်ရန်ကိုသာ လက်ခံယုံကြည်မိပါသည်။ တိုက်ပွဲပုံ စံကိုသာ မိမိတို့တတ်နိုင်သလို ရွေးချယ်ရပါမည်။ သို့သော်အပျော့ဆွဲလမ်းစဉ်ကို မပြုလုပ်သင့်ကြောင်း အကြံပေးတင်ပြအပ်ပါသည်။

မှတ်ချက်။ ။ ကျွန်ုပ်သည် စစ်အာဏာရှင်ဟုသာ သုံးနှုန်းသွားပါမည်။ စစ်အစိုးရဟုမခေါ်ပါ။ ၎င်းတို့ကို အစိုးရအဖြစ် လုံးဝအသိအမှတ်မပြုသောကြောင့် ဖြစ်ပါသည်။

0 comments:

 

©2009 မောင်ကျည်ပွေ့ | Template Blue by TNB