အတ္တကိုခွာချဖို့ မကြောက်ပါနဲ့

မောင်ကျည်ပွေ့ရဲ့ ဆရာက မောင်ကျည်ပွေ့ကို ဆုံးမစာလေးရေးပေးပါတယ်။ ဆုံးမစာလေးကို ဖတ်ပြီးတဲ့ နောက်မှာ ဘလော့ပေါ်တင်ချင်လို့ ဆရာ့ဆီခွင့်တောင်းပြီး တင်လိုက်ပါပြီ။ အကျိုးရှိမယ်လို့ ယုံကြည်ပါကြောင်း…

မင်းကိုပြောချင်သေးတယ် အတ္တအကြောင်းလေးပါ။ လူဆိုတာ မွေးဖွါးလာကတည်းက အတ္တကို ချီပိုး လာခဲ့ကြတာပါ။ လူအဖြစ်အသက်ရှင်သန်ရပ်တည်လိုမှုတွေနဲ့ ရှင်သန်ခြင်းကို ပွေ့ဖက်ထားကြတယ်၊ မျှော်လင့် ချက်တွေသွန်းလောင်းပြီး ကြီးထွားဖို့ ကြိုးစားကြတယ်။ ဖြတ်သန်းလာတာနဲ့အမျှ အတ္တကလည်း မြင့်တက်လာ တာပါပဲ။ ကိုယ့်အတ္တဟာ သူတပါးအကျိုးစီးပွါးကို မထိခိုက်ဖို့တော့ အရေးကြီးပါတယ်။

လူဆိုတာ တစ်ယောက်တည်းနေထိုင်ရှင်သန်ဖို့ မလွယ်ပါဘူး။ ကိုယ့်မိဘ၊မိသားစု၊ ဆွေမျိုးအသိုင်းအ၀ိုင်း ပတ်ဝန်းကျင်အားလုံးနဲ့ ထိတွေ့ဆက်ဆံကြရပါတယ်။ ဒါကြောင့်လည်း အတ္တနဲ့ပရ မျှတစေဖို့လိုပါတယ်။

အတ္တအစွန်းရောက်ရင်တော့ အများရဲ့မကျေနပ်မှု၊ ငြိုငြင်မှု၊ ဆန့်ကျင်မှု၊ တော်လှန်မှုတွေကို ရင်ဆိုင်ရမှာပဲ။ ကိုယ်တိုင်လည်း အတ္တကြောင့် ထောင့်ကပ်သွားတတ်တယ်။ အများကို လျစ်လျူပြုလို့မရပါဘူး။

အတ္တကိုရှေ့တန်းတင်ပြီး အရာရာတွေးခေါ် ပြောဆို ပြုမူနေရင်တော့ အမှားတွေကိုပဲ ဆင့်ကဲဆင့်ကဲ တွေ့ကြုံရလိမ့်မယ်။ အများရဲ့ မှန်ကန်တဲ့ဖိအားတွေကို အတ္တနဲ့ကာကွယ်နေလို့ကတော့ နိဂုံးမလှဖြစ်ရမှာပဲ။

ပတ်ဝန်းကျင်ကို အများကို မတရားလုပ်ရင် ကိုယ်တိုင်လည်း တရားသဖြင့်နေလို့မရနိုင်ဘူး။ ကိုယ့်ကိုယ်ကို မတရားပြန်လုပ်ရတော့မှာပါ။ ကိုယ်က မတရားလုပ်ထားတော့ အများကိုပြန်ကြောက်နေရပြီး ကိုယ့်ဘ၀လုံခြုံ အောင်လုပ်ရင်းနဲ့ ကိုယ့်လွတ်လပ်မှုကို ကိုယ်ရိုက်ချိုးဖျက်ဆီးနေရမှာပဲ။ နှစ်နှစ်ခြိုက်ခြိုက် မအိပ်နိုင်ပဲ အိပ်မက် ဆိုးတွေနဲ့ လန့်နိုးနေရမှာပဲ။ မြိန်မြိန်ယှက်ယှက် မစားသောက်နိုင်ပဲ ကျီးလန့်စာစား နေရမှာပဲ။ သွားချင်တိုင်း မသွားရ နေချင်တိုင်းမနေရပဲ ကိုယ်မတရားလုပ်ထားတဲ့အများရဲ့ ဒဏ်ခတ်မှုကို စိတ္တဇနဲ့ ဖိစီးခံစားနေရမှာပါပဲ။ မကောင်းမှုချည်းပြုလုပ်ပြီး ဂျီအီးဂျီလန့်နေ ဆိုသလို အရာရာကြောက်လန့်နေရတော့မှာပဲ။

ဒါကြောင့် ကြောက်လန့်နေရခြင်းကင်းအောင် စိုးရိမ်နေရခြင်းကင်းအောင် အတ္တကို တိုက်ချွတ်ပစ်လိုက်ပါ။ လျှော့ချပစ်လိုက်ပါ။ အတ္တကို ခွါချဖို့ မကြောက်ပါနဲ့။ အတ္တတွေ အခုလျှော့ အခုနည်း အခုပျောက်ရင် အခုပဲချက်ခြင်းချမ်းသာသွားလိမ့်မယ်။ စိတ်လည်းချမ်းသာ ကိုယ်လည်းချမ်းသာရမှာ သေချာပါပဲ။

အခုပဲ အတ္တကို ရဲရဲ တိုက်ချွတ်ခွါချလိုက်ပါ။ မကြောက်ပါနဲ့ အများက နွေးနွေးထွေးထွေး ငြိမ်းငြိမ်းချမ်းချမ်း ပွေ့ဖက်ကြဖို့ ရှေ့မှာဆီးကြိုနေကြတယ်။
ငါးထန်းရွက်

0 comments:

 

©2009 မောင်ကျည်ပွေ့ | Template Blue by TNB